Ja mei ... 
 

de Schweizer, gell.

Do wollt` i doch in naher Zukunft glatt in d`Schweiz auswandern - und wos is? De Schweiz is z`kloa! Sie platzt förmlich aus allen Nähten. Oh je. De Schweizer Rentner beschwern se, weil`s koan Platz mehr in da Trambahn oder im Zug ham. De Zuwanderer versitzen de ganzen Plätze moanans. Warum müassn ausg`rechnet de Leit, de den ganzen Tog Zeit ham, zwischen 7 und 8 Uhr in da Früah mit da Trambahn spaziernfahrn und mittags kurz nach 12 Uhr beim Metzger sei, wenn da Andrang am Größten is. Des is ja wia bei uns...

I hob mir des scho lang amoi denkt, daß de Schweiz z`kloa is. Wenn ma in Samnaun beim Skifahrn is, muaß ma bei da Gondel scho amoi so 10 Minuten warten, bis ma do einekimmt. Und des san vor allem Deutsche und Österreicher, de dort o`stengan. Do macht`s für den Schweizer scho Sinn, daß er gegen Massenzuwanderung stimmt.

Am besten aiso ab nach Sotschi zum Skifahrn! Do hod ma Platz und man kriagt auf de Tribünen bei de Olympia-Events bestimmt no an Platz. Aber vielleicht ham`s de Tribünen ja zu groß baut. Da Russ` denkt hoid amoi größer ois andere. So d`Schi san packt ,auf gehts!
 

In diesem Sinne, an Guadn und laßt`ses Eich schmecka, Euer

Karl Hackl